إذا أردت أن تكون مجرما فعليك أن تكون مظلوما، أو مطحونا أو فقيرا أو مسكينا حتى يسهل على رجال الشرطة التعرف عليك فيجعلونك مجرما لأنهم المفرزة الأولى لصناعة المجرم، يعنى من الآخر لو قابلك ضابط الشرطة أو حتى مخبر وأعطاك كم قفا وجرك إلى قسم الشرطة ونلت هناك التشريفةالمعتبرة، وأخرج من خزنته كام برشام أو سكينة، أو مشرط ، إعلم من هذا الوقت أنك على أول درجات سلم الإجرام، وتبقى أمك دعيالك لو خرجت من هناك سليم عشان تكمل طريق الإجرام،لكنى أنصحك وعلى وجة السرعة إنك تسيب مصر وتهاجر لأن البلد دي أصبحت مش بلد المصريين.لكن أحب أنبهك وأوصيك قبل ما تسافر إنك تحذر المادة 179  ودى موصيبتها مصيبة لأنها تصفك بأنك إرهابي وما دومت أرهابي فأى دولة لن تقبلك ضيفا عندها،علشان انت ارهابى، وعلشان كده أنا شايف إن أحسن حاجة تعملها إنك تتوكل على الله وتروح تشوفلك موته.لأن المادة 179 ستحاسبك على مجرد تفكيرك في أي عمل لإنك كنت تنوي؛ والنية محلها القلب، وأمن الدولة ودانه على كل قلب مصري مطحون علشان كده هو هيكتشف إنك إرهابي مجرد ما يخطر على بالك أى شىء.وأحب إنى أنصحك كمان من باب النصيحة إنك لا تسمع للمقولة اللى بتقول "امشى جنب الحيط" لأنك لو مشيت جنب الحيط وأحد من المخبرين الهمام أو رجال أمن الدولة شافك تبقى الدنيا اتهدت على راسك وعلى طول هيقول إنك بتعلق منشورات أو ملصقات ويجرك على أمن الدولة على طول وتروح هناك فى أماكن عمرك مشوفتها ولا حشتوفها غير هناك وناس من البشرغير كل البشر، نوعيات من الأزمان المنقرضة ومعاك ربنا وترجعلنا بالسلامة.صناعة مجرم ليست صعبة لأن أي ضابط شرطة أقسم اليمين عند تخرجه أن يجعل شعب مصر المطحونين مجرمين.أما علية القوم، واللى بيلعبوا بالبيضة والحجر فلا خوف عليهم لأنهم قريبين من السلطان وأولياء السلطان، وحبايب السلطان والكل بيقدم فروض الطاعة مع المعلوم ولو معملش كده يبقى بيحط نفسه في زمرة من سيذهبون وأهليم وأموالهم وراء الشمس -أمثال الإخوان- وهناك الجو هيبقى حر عليهم شوية لكن أفضل من العيش في ظل نظام ودولة أصبح كل اللى فيها مجرمين.وختاما يارب لا تتقبل دعائهم الذي تدعون به الداخلية والنظام وبيقولوا فيه:اجعل ثأرنا على شعبنا!                       وانصرنا على من عارضنا!      ولا تجعل مصيبتنا في  حُكمنا!        ولا تجعل راحة الشعب أكبر همنا ولا   مبلغ عِلمنا!ولا الانقلاب العسكري مصيرنا!        واجعل القصر الرئاسي هو دارنا ومستقرنااللهم ثبتنا على الكرسي تثبيتا                   وشتت المعارضة تشتيتا

ومبروك يا مصري: أنت الآن أصبحت مجرما، وكمان إرهابي